GHÈTO MAI PENSÀ ?

Ghèto mai pensà cò te firi de festa
traverso canpagna col s-ciopo par trare
e te vedi chèe case copà da le erbaze:
le gorne co i busi e i cupi sgalembi,
finestre col mus-cio, la porta de sbacio ? ...

Na corte de tera, galine che ruspa
te l'orto desmesso:
ghè on poche de verze magnà da le rughe,
du-tri grisantemi,
na vegna de clinto, na pianta de cachi ...

Ghèto mai pensà de farte corajo
fermarte davanti,
no tòrte nè cachi, nè verze, ne fiuri,
scoltare pitosto
Se oltre chea porta ghè on vecio o 'na vecia
restà lì da sola
pì bona de dire, pì bona de urlare:
" Signore del zielo, vardè qua da basso!
Sta straza de vita no ga pì l'amore:
Ciamème de sora chè mi no ghe 'a fazo! "

Ghèto mai pensà ?



©Biblioteca Comunale di Minerbe
Materiale pubblicato su concessione per Il Punto Web