BESBEI DEL COR

Verso sera,
vien a gala le prime stele
che i cavaloni blu
spampana dapartuto,
finchè la luna, da bon pastor,
no la le rancura
parandole in s-ciàpo
verso l'aurora.
Drento al scuro,
tacade al ciodo dei ricordi,
s'à fato fiale
le rime de 'na volta.
I'è foje morte,
gropi de emossioni, malinconia,
che la bavasèla fina porta via.
Besbei del cor,
ch'el silensio scolta
Come da na grèola
de'n confessionàl.
V'avea ciamà par nome
alora ve conosseva ben,
eri el me Dio in principio,
adesso solo un destin
che struca, che ferisse.
Le stele intanto, come butelete,
sentade sul confin de l'orisonte,
le dindona senza pensieri
le gambe ne l'asuro.
Me fasso paràr 'vanti
dal baston bianco de la luna.



©Biblioteca Comunale di Minerbe
Materiale pubblicato su concessione per Il Punto Web