Segnalazione di Merito
" LASSEME CHI " di Luciano Bonvento
( Buso - Rovigo )
LASSÈME
CHÌ
Xe inutile che v'inrabiè fiòi
mi vojo restare qua su'a mè téra
dove l'erba d'i canpi verdi
me cònta ancora e fòle de 'na òlta
dove el merlo fis-cia in libertà.
Voaltri n' savi còssa vòe dire
scoltàre e paròe del vento
i canti stonà de 'e rane
el borbotàre del vècio Adese
i petèguizi de'e zèleghe a'la sera
vardare e rondine sgràfare el sole
fin a farlo sangoànare nell'ora del tramonto.
Lassème chi fiòi
fin che i mè oci vedarà la luce
dove tuti parla de la me lengòa
so' sta tèra de fumàre e storie de miserie
dove el fròmento sa odòre de pan vèro
dove gò amà la mè dòna
e si nati voialtri, fiòi mii.
Quando no'contarò più i dì
e 'na Crose segnarà el mè siènzio
spandarò l'anima drènto i sòlchi
spetàndo nòve primavere;
vòjo èssare pensiero che svèja la matina
'na batisòsola a passèjo co'fa scuro.
Lassème chi fiòi
dove la poesia de sta tèra ga vestio la mè vita
respirà tuti i mè sogni.
