Le Istà mie de 'na olta

Girando, ieri,
tra le pagine,
de la memoria,
a g'ò rivisto i giorni
de l'istà.

Quando i veci, strachi,
i ponsava le fadighe
co'la testa so la tola
e el sole 'l brusava
aria, piope e cristiani,
mi naséa a scola
in mezo ai campi
e tra pomari, platani
e salgari
scrivéa senza la pena,
sol me core,
i esempi pì assé ciari
de la vita.

Quante robe ò imparà
guardando i fiori,
quanta musica
g'ò meso drento a l'anima
scoltando i oseleti
che cantava!

E adesso... Adesso
gh'è passà on saco
De ani.

L'inverno de la vita
el se avicina
ma tuto quel che fao,
fin che vien sera,
l'è quel che ò messo drento
in primavera.